Viéure en Azerbaïjan-Episodi II
Da Jennifer Baret
Vourìi prouvà de vi cuntà lou miéu despatriamen.
Racoumandi en toui de viéure luen dòu siéu païs, un còu en la siéu vida.
L'estiéu es lou perìodou chausit per partì en vacança e descurbì un luec noun counouissut. Es lou bouòn moumen per vi presentà cen que l’Azerbaïjan a d’especial. Es pas una destinacioun poupulàri ma es un païs que merita d’estre vist. L’ourganisacioun d’evenimen couma l’Eurovisioun en lou 2012, la finala de la ligua Europa en lou 2019, lou gran pres de Fourmula 1 cad’an, fan parlà d’aquèu païs.
La capitala de l’Azerbaïjan es Bakou. Lou mot « Bakou » vòu dire « touplen de vent ». E es ver. Li a souvent un gran vent.
Li a una vielha vila embé de muràia ma li a tamben de mounumen propi moudern embé un’architectura incredìble.
La lenga dòu païs es « l’azeri » que ressembla veramen au turc. Ma li gent parlon finda russou perqué d’un temp, l’Azerbaïjan era una Republica sovietica.
Lou simbolou de l’Azerbaïjan es una « maigrana ». Pouden trouvà de maigrana dins lou vin, dins li salada. Li a finda touplen d’oujet de decouracioun que an la fourma d’una maigrana.
L’Azerbaïjan mi fa pensà à Nissa perqué li a la mar e li mountagna.
Lu abitant an la siéu proumenada dei Inglès. Si souòna lou « boulevar ». Es una passejada doun si pòu veire la mar Caspienne.
Li mountagna dòu Caucase soun propi belli. Li gent an una vida simple e quieta, luen dòu bousin de la capitala.
En Azerbaïjan, si manja propi ben. Li a d’especialità couma lu
« baklava » o li fuelha de vigna farcidi que retrouvan finda en d’autre païs. Lou pastissoun que mi plas de mai es lou « shekerbura » Es un pastissoun au perfum de « cardamome » e d’amendoula, couhinat soubretout per la festa de « Novruz ». Es una grana festa per chelebrà la prima e la natura.
Lu miéu païsage preferit soun la mountagna de fuec o encara li voulcan de fanga. Soun da veire un còu en la siéu vida.
Vièure en Azerbaïjan noun era aisat cada jou ma serà en la miéu memòria per toujou.
A ben lèu !
