SIAU PAS COLHON, SIAU COGORDON
Da Richard Cairaschi
Lo cogordon es de la familha nombroa dei coloquintes, coma li cogordas,
mas li cogordas son bòni (da manjar), lu cogordons NON !
Dei cucurbitacéas es lo mai sacrat, adorat, venerat, e a Nissa es consacrat. Cu non a lo sieu cogordon a maion ?
En li maions nissardi, es èu lo rei !…
Coma naisse un cogordon ? Coma la cogorda, mas la cogorda es bòna, lo cogordon NON !
Coma si planta un cogordon ? Coma la cogorda, mas la cogorda es bòna e lo cogordon NON !
Pilhas tres granas de cogordons, totjorn tres, se n’i a doï que cagan, n’i aurà totjorn una que grelherà.
Cau faire un bòn trauc emplit de bòn fems, cau que fague un pauc bòn: 20, 22 grads de temperatura.
Mete li granas dintre, d’aiga, de solèu e ve !… l’escampat sòrte la tèsta.
Quora lo cogordon creisse sembla un plan de cogorda. Mas la cogorda es bòna, lo cogordon NON !
Quauques temps plus tardi, me d’aiga e ben de solèu mas pas tròp, tra li folièlas e li radicèlas lo cogordon creisse…
Coma es bèu ! Sembla totjorn una cogorda, mas, maufide-ti, es un cogordon. Avise-ti que la cogorda es bòna, lo cogordon NON !
E la flor aparèisse, com’es bèla me lo sieu color blanc, au contrari de la flor de cogorda qu’èla es ben jauna.
E la flor de cogorda es mai que bòna, aquela dau cogordon NON !
L’as ja tastat ? NON !
La flor de cogordon es blanca perqué si fa polinisar de nuèch. Doncas, l’idèa que li cogordas e lu cogordons si pòscan maridar es faussa.
Li cogordas aí, lu cogordons NON !
E a la nuèch, la flor blanca si duerbe, emé un pistil enòrme, cargat d’un molon de polèn, un’ofrenda per lu polinisators de la nuèch que si baton per n’en pilhar mai que la sieu vesina : « Pousse-toi connasse, j’étais là avant toi ! »
Pi, me l’ajuda de la natura, naisse un pichin cogordon. Com’es bèu, tan ben curvat que ti dona l’envueia de lo careçar, de lo coconar.
Embé lo solèu e la sieu creissença, es ben plus bèu que la cogorda, mas èla es bòna e lo cogordon NON !
Lo cogordon a la particularitat d’estre, quora es jove, extremament peant, e quora es vengut vielh extremament dur a l’exterior e vuèi a l’interior. Es per aquò que s’avesina de l’òme!
Lo t’ai ja dich, siáu pas colhon, siáu cogordon.
"Certaines familles de cougourdons se dégustent jeunes. J’ai goûté, c’est meilleur que la courge"
Alors la courge NON ! mais le cougourdon OUI !
