Qu noun sauta noun ve carneval.../Doi salas,doi ambients.

Da Edith Faraut/Da Dàvi Assas-Silveri

Carneval es arribat, Carneval es cremat, adiu paure Carneval e tot aquò si fa tra quatre barris...


D’efèct siam fortunats d’assistir a la mai grana manifestacion viva dau patrimòni de l’umanitat ! Aí, mas tra quatre barris.

Siam fortunats de veire li brigas d’una cultura regaladi ai forestiers qu’acompanhan aquesta solombrina de ­­­« parada nissarda » coma l’ataüt devers una fin anonciada ! Aí ! Mas tra quatre barris.


E vequí que lo resson terrible de l’actualitat a ragantat la serrada de barradura elitista d’aquèu dissabta lo 26 de febrier dau 2022 e a meme, dau buòn, descantonat lo cacan promier de la sieu gàbia daurada. En reacion a la situacion espaventoa de l’envadissament e l’agression d’Ucrània dau Potina e la sieu màfia, lo cònsol promier, d’una abriva de bravora internacionala, s’es calat au mitan de la paura chorma dei majoretas ucraniani pèr li afortir lo sieu sosten. Siam n'un monde de comunicacion lo sabètz ben. S’es passejat au mitan, a picat dei mans e a meme saludat la banda ! A fach una raça de « lève-ti d’aquí que li mi meti » dont èu solet a lo segret. S’es pilhat lo lume, la television, la pressa e pi, tendina ! Li es pas pus ren da mirar. A fach finda denembrar lo moment dau temps la tonalitat amistoa tratenguda mentre de decenia m’aquelu famós oligarcas tant numerós au nuòstre que vènon toi la si faire buòna a bòrdo dai sieus batèus gigantàs m'ai tirados que devesson sus la « Côte d’Azur » coma si ditz en francés.

En lo fra-temps, aquèu dissabta lo 26 de febrier dau 2022, a circa de 2392 quilomètres de Nissa, n’una vila que toi la dion Kyiv, lo cònsol promier d’aquesta ciutat a pilhat lu remedis pèr li defendre la sieu vila en rega promiera… Doi salas, doi ambients.


Es ensin que lo Peolh Revengut segond arriba e vau de’n promier rengraciar la combrícola dau jornal que sensa èlu ren si fa e dau segur lo monde qu’a crompat l’edicion promiera.

Siatz dei pèis e v’auguri una raissada de pèisalat pèr sempre.

En tant una baieta en toi e non denembratz :

"Siam pas colhons, siam cogordons."


 


 



 


70 vues0 commentaire

Posts récents

Voir tout