Qu aspera si desespera.
Da Patrici Arnaudo
Letra d'un proufessour de « patois » a la siéu ierarquia.
Monsur lo Conselher dau Rector per l’ensenhament dei lengas regionali,
Monsur, madama lu Provisors,
Cars collegas,
Coma cad'an mi prepaui de passar en quauqu collegis perfins d'assabentar lu escolans sus de la possibilitat qu'an de chausir l'opcion nissart en segonda. Fa mai de doi setmanas que pròvi de jonher aqueli administracions 'me totplen de difficultats. Vi volii doncas tenir au fiu per faire embé vautres un promier bilanç e testimoniar dau mieu sentiment frònt en aquela situacion.
- Au collègi Fabre : l'administracion me prepauava un rescòntre ciblat embé d'eventuals collegians interessats da l'opcion... Mas coma lo porrion èstre alora que li opcions facultativi apareisson en minga luec en lo siti dau governo « Affelnet » ? Ai sinhificat a la pricinpala de la miéu volontat, au contrari de generalisar l'oferta... e fin finala un apontament es previst lo 2 de Junh que porrai veire l'ensem de li classas.
- Lo Collegi Valery, prepaua d'informar lu collegians mentre la setmana dau 20 de junh, tròvi la data un pauc tardiera e ai gaire envueia de mi plaçar per intrar en de classas vuei, ai fach un message en aqueu sens au mèstre d'aqueu collegi, mas per lo moment ai minga respòsta. Per faire lo parangon, lu professors d'italians an poscut li presentar la seccion « Eurò » en la setmana dau 20... de Mai...
- Au collègi René Cassin de Toretta, l'administracion m'a respondut sus-lo-còup ! Per mi dire de ...non passar ! Que d'aquesta passa an minga minuta da consacrar au nissart estent que s'afachendan d'alestir lo brevet.
- Au collegi de l'Arquet (establiment de li còlas nissardi) la miéu mieja-dozena de telefonadas an reçut, per lo mement, minga respòsta...
Dire que non mi senti sostengut en lo mieu trampin seria un eufemisme e aquela situacion de l'autre monde seria da s'escracanhar dau rire non auguesse de tant marridi conseguenças per l'ensenhament e l'avenidor de la lenga nostrala. Que lo coeficient per l'espròva dau « bac » n'es estat tornar valorisat mas per cen que ? Estent que lu liceans n'en son pas estats informats maugrat lu dispositiu previst per lu acompagnhar en la siéu orientacion...
Despi 20 ans aüra juegui a faire la reclama per lo mieu ensenhamen. Aquel'òbra a jaba e gaire valorisanta la fau, non pas per lo plasir, mas per parar a la mancança d'informacion en cada niveu de l'educacion nacionala.
A la rintrada que ven, lu responsables de la nòstra institucion va diagnosticar un problema de « demanda » per cen que tòca dau nissart, en faguent finta de non saupre que es l'oferta que non esiste e que sensa ela li aurà jamai minga demanda. Se durant d'ans e d'ans l'occitan foguèt l'opcion la mai pilhada dai liceans de l'Acadèmia de Nissa es unicament gauch au trampin militant e gracios dei sieu professors.
Per cen qu'es d'aquest'an : Passerai doncas lo 2 de Junh au Collegi Fabre mas per lu autres establiments mi sembla aver capit que l'informacion que tòca au miéu ensenhament fa pas part dei sieu prioritats coma lo ligament terça-segonda....
Coma faire ? La mieu educacion e lo mieu atge avançat mi desfendon d'escaladar li grasilhas dei collegis e encara mens d'intrar de fòrça en de classas dont lu collegas saban manco que lo mieu ensenhament existe.
N'en siàu doncas da mi faire una demanda :
-Non serion da mi faire jugar en un juec que li règolas son stòrti e la partida perduda d'avança?
- A cen que sierve de sonar d'administracion que an plus ben da faire que de pomòure la lenga dau sieu paìs ?
Se avètz de conseus e se pensatz qu'es encara l'ora de lu aplicar, vi ringraci de lu mi donnar que seran, dau segur, lu benvengut.
Vi ringraci de l'interest que porteretz au mieu corrier e vi pregui de creire a l'expression dei mieu sentiments lu mai espetuos.
Coralament.
