Nissa lou grand carneval !

Da Jouan – Reinat Lionelli


 

Ben ségur noun vouoli parlà dòu carneval que ven de s’acabà au nouostre !



Aquèu de carneval !!! Reservat ai fourestié countra d’escut ben sounant e trabucant o ai bouoi citadin ameritant doun lu counfetti si mandon m’una a grossa poumpa mountada sus d’un carre. Ahura minga esfouors per s’amusà ! Manda la poumpa ! An tout previst, tout assetisat ! Avès basta à v’assetà, mirà l’espetacle en pican dai man coura lou vi demanda l’espicour en lou sieu micrò en bramant« Faguès de bousin » ! Se per cas de pichin bastardoun nissart vourguesson ficanassà un pauc sensa ren pagà ,an mai un còu pensat en tout ! An mes de grossi tola ben espessi per escoundre l’espetacle ben poulit …. qu’a pu ren da veire m’au nouostre carneval !

Couma lou v’ai ja dich lou darrié còu sus Palhoun que fa vergougna, sembleria que tout sinque toca à la curtura nouostra deve estre souterat, pistat, arancat ! Pareisse que sien pas UNESCO coumpatible ! Li valour dòu poble nissart, tradicioun, lenga o arquitetura serion couma de veruga que cau escoundre ! Encà urous que lu Chinès noun vouolon d’aqueu poble de degenerat que serian o de cousanguin per qu, d’unu, vourion nen fa passà !! Noun, élu son basta vengut per si croumpà sa maestà de cartapista me la sieu court de palhàssou ! Gauch proun, dòu senoun per doui escut n’en manderion en Tibet o dai ouhigourt !

Per n’en revenì en aqueu grand Carneval, es d’aqueu cìrcou que n’en fan aquì despì doui an toui aquelu tavan que vouoli vi parlà ! Ahì d’aqueu champoustre qu’èra mai per nautre una lounga carema qu’un Mars gras ! Son mouorti li grossi testa,viva li banbana ! Lou palhàssou sembla estre devengut lou mestre à Nissa despì aquella fachenda !

Sien estat la lieta dei mège auto-prouclamat de França touta !

Es aquì qu’es estat pantalhat dai sercaire de touta mers, vau pas dire que son de trouvaire, l’antidòtou de la bestialità umana ! La medecina countra aquella bruta maulautia espicosouciala, aquella pèste politico-mediàtica qu’es lou coulhounavirus !

Aven ben evouluat despì l’estroun foucilisat de terra amata « doun soubre qu toui lu sapiens dòu mounde venon si clinà » diguet Dédé Truquì !

Nissa d’un còu es estada proupulsada en lou tèrçou milenari ! Nissa la capitala de la recerca maja !!!

Sien estat lu proumié que n’an barat à siei oura de vespre per ben s’esquissà toui ensen vìtou,vìtou en lu masaguin per si croumpà lou past o lou pan dòu serra, lu un countra lu autre en si boufant d’aria empestada au nas à la sourtita dòu travai !

Es aquì qu’an barrat riba de mar ,perque pereisse que l’aria dòu larc fa mai de mau qu’aquella coundiciounada dei bureu, trambalan, tren o dei grand negoci !

Avion ja levat li nouostri legendari cadiera blu per fin que lu nouostre pichin viei noun pousquesson pu li si assetà per mirà lou blu ourizount en si repilhant l’alen dintre d’un bouf d’aria empestat ! Ben segur era per lou sieu ben ! Son pas naissut de la darriera plueia, lu nouostre beri blanc …ma saben jamai !

Es en la nouostra cieutat qu’an serrat ai vìsita dei familha, li maioun de retir souta la respounsabilità de la coumuna ! Lu nouostre mesquin parent crepavon mai de chacrin que dòu coulhounavirus fin que que lu nouostre sapiens si reviresson, s’auguent enavisat de la sieu bestialità .Una de mai ! « Erare humanum est » (sieu pas univercitari,acò l’ai emparat dins ‘na banda dessinada « d’Asterisc ») !Ma « perceverare diabolicum » couma si ve aquì souta !

Defet, es da nautre que li televisioun de França touta an filmat lou camin dei inglès, propi vuei, per mounstrà que lu nissart respetavon ben l’arrest de gouvernatour virouletta proumié !

An simplament oublidat de virà l’esquina dau coustà dòu setentrioun doun lu caminaire eron toui esquissat à si pistà lu agacin sus lou pedounié ben pu mai estrech que dau coustà dòu miejou ! Lou pouodi dire, li eri !

Enfin, es acò de nautre que n’an mandat de drònou sus lou moure ! Sabès aquelu pichin aviounin sensa pilòtou ! Li espia dòu milhou dei mounde moudèrnou que nen proumeton, e que filmon ! En mai d’acò aquelu parlavon ! D’aquì à n’en tenì lou bouchin ?

« Avès pas lou drech de calà sus la plaia .Scapas-vous vìtou dòu senoun vi manderen la miliça ». Aquelu que si senton soulet,à Nissa si pouodon adreissà au ciel ,li respounderà ! Lou milhou dei mounde vi dieu !!!

Ma aquèstou còu la CNIL e lou Laurenç Fai -bus que si peneca au couseu counstituciuonal à Paris, an dich noun ! Pareisse qu’acò faia un fai de libertà levadi tròu dòu sùbitou e que cauia laissà un pauc de temp ai nissart per que s’acoustumesson ! « vouriès pas que li jaca jauni s’abrivesson mai per carriera,noun ? Ja que pouodon pu faire lu estrapioun en riba de mar e si beure lou souleu ,mesquin ! »

Passi sus lou fach que, mai aquì, un voulia levà l’indemnità dòu caumage ai fegnantas que voulìon pas si fa pougne, meme se eron pas desoucupat e que pagavon la sieu lemòsina, escoutissoun, impost o sinque voulès en caucu bouoi citadin, que elu li avion drech !

Se tout acò noun es de grand carneval ,li capissi pu ren!

Fin finala gauch au gym menat dau « ComanDante », lou mai nissart dei Bresilian couma Anita Garibaldi, sian nautre lu seguran pestiferat, mounstrat dòu det despì un fai de temp da Paris, que mounteren à la counquista de la capitala !

Aqueu grandìssimou Dante a ja la sieu carriera à Nissa !Li maridi lenga dìon qu’ es en l’ounour d’un un fousc flourentin ! Ma que a da veire aqueu machiavèlicou me la nouostra cieutat ? Dòu bouon ! Es ver que li anen plan -planin ma sien pancà en infern !

Nissa la mespresada que sembla en equilibre sus la pouncha de l’escandalh dòu counfin géo-polìticou dòu troufèou de Gusta,l’imperatour rouman, que counquistet aquì li darrieri tribù lieuri. Ben segur an pura emparat ai nouostre grand, en li escola dei Hussard negre, que lu nouostre antenat eron de gallès, couma ai pichin african en lou fra- temp, aloura que élu si pensavon sene-gallès ! S’en empara propi touplen à l’escola !

Dounca aquella finala de foutebala si jueguerà lou 7 de Mai countra lu nantès ,que la França de Pétain aranquet à Bretagna !

Nissa nova noun vau pu de nautre ? E ben es à Paris que planteren la jòstria, couma diion lu talian de passage en circa dòu 42 ,43 !

Li proumeten un propi beu carneval à la nouostra moda ! Un rau tau plau de l’autre mounde ,couma si di en aquella cansoun de circounstança

« A Paris li era ‘na vielha rau,à Paris li era ‘na vielha rau, una vielha de setant’an rau tau plau la vielha … »

De rouge e de negre da pertout à fa perde lu coulou au rouman dòu Standhal !

De jourgina, de vespa m’ai sieu cougourdoun menadi dòu grand cap d’ourquestra Richard Cairaischi e un fuec d’artifici tamben en lou ciel lutecian, per un còu luminous, qu’en li gabia de l’aversari traucadi da l’ataca nissarda !

Couma un vol d’aigloun fouora de l’ossuari natal, aurìa pouscut dire lou poueta, aneren querre e brandisseren bessai la coupa que si pilheren me delicatessa m’ai nouostre arpioun ! La si leveren, aquella bella cativa tant desirada que si moufissia aià despì d’an e d’an en pais dòu garbin ! La si pourteren aquì, au nouostre souleu d’or, per que si tourna fa una sanità luen dòu setentrioun !

Issa Nissa ,viva carneval

e manda la poumpa !!!



 






 


81 vues0 commentaire

Posts récents

Voir tout