N’avem d'ideas !

Da Matèu Blas


Alora bravi gents ! N’avètz d’idèas ?­




Alora bravi gents ! N’avètz d’idèas ? Segurament, que cadun a lu sieu pantais e li sieu envuèias. Nautres n’avèm d’idèas per la promocion e lo manteniment de la lenga nostrala. Autre que !


Per foarça, avèm ben capit que li idèas vendràn pas, malurosament, dei responsables políticos de la Vila, de la Metropòli, dau Despartament ò encara mens de la Region e de l’Estat. Elu, fan basta cen que cau per èstre tornamai elegits… Cau alora si pensar tra nautres, si bolegar sensa ren asperar dai autres. Que de senon, la lenga starà muda per totjorn en l’indiferença generala.


E doncas d’idèas, n’avem. Totplen ! Li son tanti cauas da faire per donar ai joves la volentat d’emparar la lenga e ai mens joves locutors de l’emplegar a cada momenton de la vida. Sociabilisar la lenga es quauquaren que si sente sovent. Mas cen que significa en pròpi ?

Es aquò lo coar de la problemàtica. Coma faire per rendre la lenga visibla, audibla e atractiva per toi lu abitants de Nissa ?


D’en promier… per carrieras. La lenga es chèrtou presenta sus d’unu panèus d’en Vila Vièlha mas es ren sufisent. Coma si fa en País basco per isemple, si porria faire una sinhalètica tota bilenga. En mai dau cost financier ligat au cambiament dei panèus, l’investiment en temps es pron limitat. Revirar « rue, ruelle, avenue, boulevard, gare, aéroport… » non ti pilha mai d’una mièja jornada !


D’en segond… en lu traspoarts. Parrierament a cen que si pratica dins lo Babasoc, la lenga es un pauc presenta, d’aquí e d’alhà per qu tende l’aurilha. Un còup au Centre Universitari Mediteranean, l’autre a Garibaldi… Confessi qu’es ja ben mas si porria evidentament tot revirar en nissart sensa que paue un problèma de comprension. Tant, lo francés seria totjorn emplegat. Doncas, tota la comunicacion, sia escricha ò orala, deuria estre bilenga franco-nissart. Permeteria de fa liéger e sentir la lenga au cada à milantas personas, de toi lu quartiers e de toti li condicions.


D’en terço… lu mèdias. Parli evidentament dei mèdias locaus. Coma lo sabètz, BFM Nissa parla un pauc nissart cada mes de matin. Aquesta Matinada Nissarda es per lo moment una bèla capitada que lu telespectators semblon aimar e asperar. Per aquesta rintrada, proverem d’en faire encà de mai que la demanda es bèla foarta. E cau ben dire que per un còup, BFM es totplen actiu dins aquesto projèct. Mas aquí si parla de 10 minutas cada setmana… France Bleu Azur propaua èla 3 minutas cada matin (à l’auba !) embé la crònica "Lou Mot d’Aqui". Echètou aquò, non mi sembla que li augue d’autres contenguts en lenga. Poarca misèria ! Nice-Matin fa plus ren levat per parlar un pauc de folclòre mentre qu’es de segur lo mèdia mai potent dau país.

Boan, ben proverem de contunhar l’aventura embe BFM per mostrar en cadun que la lenga permete de parlar de tot, modernitat comprèsa, e sobretot que li es un pùblico.

Fètz virar la lenga !


 



34 vues0 commentaire

Posts récents

Voir tout