Manda la pompa ! Un còup de mai !
Da Dàvi Assas-Silveri
"Adieu Pantai" da Edith Faraut.
Manda la pompa beu !
Manda lo bochin bicolin !
Que gòga ! Ve qu'aquelu embarassa-camins de chorma de chapacans de l'achident dau Peolh Revengut s'en torna un còup de mai !
Fèm tirar aqueu projèct de blòg/jornal per aquesta annada dau 2023 ! Ben que contenterà ren cadun mas cen que volètz que vi digui... Li es de plaça per toi e sobretot quora s'agisse d'escriure en aquesta lenga. Sabètz aquesta lenga de forestier ! Aquesta lenga qu'es da si crepar au plan-planin en l'indiferéncia quasi generala ! E se n'en fèm sudar d'uni e d'unu e bé ve ! Buòn pron vi fague perqué per nautres serà lo parier.
Avèm au manco reüssit mentre un an, e voei un an fa que lo projèct s'es encaminat, de prepauvar un espaci de creacion nissard, de reviscolar modestament lo ment de la pressa dialectala tant florida au nuòstre au principi dau sècolo XX, de libertat gràfica, de libertat d'espression, un chícol satírico de còups que n'i a mas es un pauc aquò lo ment carnavalenc né ? Provam de faire un travalh solide e de buòna mòtria en anant ficanassar en toi lu recantons de la cultura multiseculària nuòstra. E sobretot de forras de rire numeroï que sensa plasir es manco la pena de trampinar lo que que sigue. Alentorn de tot aquò son naissudi de seradas per presentar cada edicion e, de fach, un espaci de sociabilitat e d'espression per la lenga nuòstra dont si mescla música dai nuòstri valadas e cultura nuòstra. Ben beu de picar sus d'un computador mas si cau descantonar un pauc !
Es ensinda que s'en tornam per fins de passar l'annada coma l'anteriora. A la sosta de la man doça de la bèla e misterioa Bellanda. Ciutat ratapinhatiera dai artistas, poètas, escrivans ò cagas bleas perduts e negats en l'imensitat de la vila d'en davau. E sus la cuberta d'aquesta edicion si pòu mirar doi camins, doi dralhas e mi garderai ben de vi dire la quala es melhora que l'autra mas es ben lo contraste e la realitat dau nuòstre univers. Ai basta fach la daida en la poblacion que li èra una jara nòva dau costat de Rauba Capeu e pi pas mai...
Fuòra d'aquò pilhi l'ocasion d'aqueli regas per aremerciar Rafeu Eusébi e Jacquo Lalli per la sieu ajuda precioa e d'aver pilhat lo temps per cercar, charrar, escriure sus d'un artista grandàs que foguèt lo Jànmarc Eusébi.
Vorrii finda aquit rengraciar la chorma que contribuisse a cada edicion de provedir de produccions escrichi. Siatz vautres lo pilastre de tot aquò. Rangraciar finda lu quists, valentós e fedels lectors. Lu esponsòrs de mai en mai numerós que creson a la bòrnia n'un espaci viu per la lenga. Nissart per Tougiou, lo CIRDÒC, la tuta d'òc, que crompan e sostènon cada edicion d'un projèct Nissard. Vi rasseguri, se cerquessiatz lo Peolh Revengut en li bibliotècas de Nissa auriatz mai ben fach d'anar veire de drech lo grand Carlo Felice... Gauch en vautres, lo projèct es independent e siam a man de non perdre d'escalhòlas. Se non plòu, degota sabètz e pi es ben conoissut, nautres, lu chautrons, calinham de merlussas per sempre.
Una baieta en toi e viva lo Peolh Revengut.
Lo jornal d'en Bellanda...
Que gòga ! : Quelle chance !
Embarassas camins : empêcheur de tourner en rond
Chorma : équipe, troupe
Maugrat que : bien que
Buon pron vi fague : grand bien vous fasse
s’es encaminat : s’est mis en marche
Trampinar : peiner, travailler dur
descantonar : décantonner