Lou Nissart à la Televisioun ???
Da Patrici Arnaudo
Au nouòstre, la lenga es plus trasmessa dai familha e estent que à l’escola la siéu presença es basta simbòlica, lu medià aurion un rôle da jugà en la trasmicioun o au màncou visibilità dòu parlà noustral .
Segur qu’esiston de medià alternatiéu , 100% en lenga que soun de qualità ma souven tenon pas en la durada (que la benevoulença fatiga li gens...) soubretout aqueli « oueb-TV », fanzine o ràdio animat per d’apassiounat que si fan plesì pertocon basta de gens que soun ja de locutour, de letour o d’auditour counvint da la nouòstra « santa » causa.
Ma cen que n’es de la situacioun en lu medià generalista, que pourrion sensibilisà de persouna que l’an jamai audida ma que pourrìon venì à lenga d’oc ?
Dihen que la situacioun es pas …..bela-bela...
En la pressa escricha pouden saludà, au nouòstre, la presença dòu « Sourgentin », revista oucitana la mai vielha (40 an au nivèu assouciatiéu es propi un esplet !) que si pòu valé de milierat d’abounat . Es ver que lu article en lenga li soun mens numerous que d’un temp ma, au màncou, li soun... au countrari de « Nissa-Matin », gran quoutidian dòu Sud-Est qu’a levat lou pichin quart de pàgina counsacrat au nissart ... en l’indiferença generala ! Aquì à Nissa doun la pressa dialetala faìa flourida un sècoulou fa...
Per cen que toca dòu servici pùblicou de l’audivisual li es una oubligacioun en lou siéu caié dei carga ma, au nouòstre, l’emplegon au mìnimou.
Sus « Radio-França » li soun 2 minuta quoura lou gal s’es pas enca’ levat à 6 oura de matin !... Finda la redifusioun en journada li es plus...
Sus « França 3 », d’un temp, l’oucitan era present au cada-jour à miejour, un’oura de grana escouta... ahura li es una miejoureta lou dimènegue de matin m’una chourma de journalista afougada ma reducha que fa lu siéu repourtage en semana es à dire quoura li gens travalhon e ben souven soun oublijat d’intervistà de retirat cen qu’es gaire bouòn per l’image de la lenga...
Quoura « Fance 3 côte-d’azur » resta brancada sus Paris, la cadena « França 3 via stella » en Còrsega a 15 oura de destacamen regiounal au cada-jour ! ‘Mé d’infourmacioun, de serìa, de juèc e d’esport coumentat en lenga corsa. Un pauc plus luèn lu bàscou e lu catalan, si pouòdon regajà « Catalunya 3 » o « ETB » e faire veire de dessin animat en lenga ai pichoui lou matin denant de lu menà en li escola en imersioun... es ensinda qu’una nova generacioun de loucutour natiéu es ben presenta en aquelu paìs...
De paìs que per nautre, amourous de la lenga d’aquì semblon si trouvà sus d’una autra planeta...
En lou Paìs Nisart, un nouvèu medià « BFM Nice » a vist lou jour e a manifestat la siéu voulentà de metre un chìcou de lenga à l’antena (un còup per mes es pas la revoulucioun...ma bouòn) e per acò faire la cadena a countatat una chourma de jouve especialistà dòu nissart, chourma moutivada e coumpetenta que s’es boulgada per alestì la proumiera emissioun que devìa estre difusida à la mitan dòu mes de Genouié...
Lu journalista de BMF Nice eron ren countent ! E tout era lest per aquèu gran moumen de televisioun !!!... Tout ? ma pas lu gran cap parisian que, a 1000 quiloumetre d’aquì, an demandat de refourmatà la crònica... per fin d’estre validada... en la capitala...
Tout es dounca remandat au mes de Febrié...à coundicioun que la censura parisiana validesse lou travalh (à jaba!) dei trampinaire nissart...
En la « soucietà de l’image » l’audiovisual en nissart mi sembla mai que vital pura...ma per lou moumen si trata d’una pàgina esquasi tan blanca couma la pàgina nissarda de « Nissa-Matin »....
