Lou Carneval à l'escola
Da Jennifer Baret
Siéu anada, en premié, à la federacioun dei Assouciacioun de la Countéa de Nissa per trouvà de libre e en saupre de mai sus aquela festa.
Ai liejut lou libre d’Annie Sidro sus lou Carneval de Nissa.
Lu miéu escoulan an emparat la debuta de la cansoun
« Adiéu Paure Carneval » dòu Corou de Berra. An sounat toui ensen, sus li vespa d’aquela cansoun, un pichin ritmou embé de « cougourdoun maracas » fach embé l’artista Djé Balèti que l’an passat venguèt nen faire una vìsita à l’escola. Aven finda escoutat la versioun da Nux Vomica : « Adiéu Barraca »
Lu pichoui an balat sus lou « Carneval dai cat » de Mauris e sus « Carnavalina ». Ahura, sabon faire una farandola. Lu escoulan an finda emparat la tradicioun dòu palhàssou. Per lou faire volà, an deugut dire : « 1, 2, 3. E manda lou palhassou. »
Aven ousservat lou dessin d'Alessi Mossa sus lou palhàssou tamben.
Ai chausit lou libre « Patounet fa de mùsica » per estudià un tèstou aisat en nissart per permetre ai escoulan dòu CP de legì en nissart. Lu escoulan an emparat lou noum dai istrument : lou tambourin, la tarabàcoula, la jourgina, lou flahut, la countrabassa, la quitara, lou viouloun e lou piano. Lu pichoui sabon finda lou noum de quauqu istrument fach emb’ai cougourdoun : li vespa, lou petadou, l’espina.
E lou Carneval noun serìa lou Carneval sensa li grossi tèsta. Aloura aven creat una grossa testa embé de carta pista. Noun es encara acabada ma serà lou rei dai Pourtegalié : un rei embé la testa d’un pourtegal emb’un cavagnòu de pourtegal e de limoun.
Ai fach veire de foto d’ièr e d’ancuèi dòu Carneval per moustrà lu persounage tradiciounal que cad’an s’aretrovon en lu corso : l’aigla, la ratapignata, lou babau, lou palhàssou…
Aven finda escoutat lu « podcast » de Patrice Arnaudo sus lou Carneval. Fa touplen plesì ai pichoui d’escoutà lou mot d’aquì sus la radio « France Bleu Azur. »
Ensegnà lou nissart à l’escola bilinga es pas soulamen ensegnà una lenga ma finda faire descurbì li tradicioun e la curtura ai pichoui e la faire descurbì ai adulte.
À ben lèu !
