"La mai bèla", Nissa-Bordèu dau 1952

Da Patrici Arnaudo


La « mai bèla » es ensinda que lu jornalistas frances sonèron aquela finala de copa de França mentre d'an e d'an.



Un Nissa-Bordèu que foguèt lo rescòntre de toi lu recòrdis. Un rescòntre au sobran que raduna alora lo promier e lo segond dau campionat per lo promier còup de l'istòria, a l'època foguèt la mai prolífica embé 8 buts marcats ! La promiera partida d'estre televisada en França, enfin embé mai de 61 000 espectators, si tracta aquì de la mai bela afluença francesa fins a la dubertura de l'estadi de França !

Aquela partida foguèt tant espectaculara que doi ans plus tardi la pòsta francesa estampèt un calendari m'una accion de juec d'aqueu Nissa-Bordeu intrat en la legenda !


D'aquèu temp, lo Gim descadena li fògas. En lo 52 es en passa d'èstre la promiera chorma da conservar lo siéu tìtolo de campion. A Nissa, una vila tota si pilha de passion per lu erois en rotge e negre, au Rai si refuda de monde cada diminche e numerós son aquelu que si van pilhar lo tren per rapresentar la capitala de la Contèa damont a Paris... de milierats de nissarts si radunan a l'estacion embé ò sensa bilheta per l'estadi de Colomba...

lo jornalista Roger Dries escriurà que

10 000 caga-bleas eran en tribuna mas que lo doble era bessai montat en la capitala francesa ! Pauc li fa !

Aquelu qu'avion pas de plaça si son passats la dimenchada en lo quartier San-Miquèu, dont lu suportaires de la "secion Paris" avion lo sèdi... Si di que mentre doi jorns aqueu canton dau quinto arondiment de Paris parlava Nissard...

Per evitre lo champostre, l'òst dont restavan lu jugaires dau Gim foguèt tengut segret...Un' idea de Numà Andoire l'adestraire extraordinari de l'OGC Nissa. Aquel'enfant de Corsegola desgordit e maliciós, qu'avia ja jugat una copa dau monde, anava marcar per totjorn l'istòria dau Gim embé doi ideas sieui, pròpi estranhi...

D'en promier, Andoire laissèt necs lu suportaires embé la composicion de l'equipa. D'efèct : decidèt de levar de la chorma li doi "estars" que trovava fatigadi. Au promier Bengtsson conselhèt de s'anar faire un giro en montanha per s'oxigenar un chicol e au segond Desir Carré l'idòla de tot un pòble, li diguèt d'estaire tranquil a Nissa 'mé la siéu calinhera, misé Vera Talchi, actriça e regina de Mai ! En plaça d'aquelu doi famós jugaires placèt en lo onze de partença Carniglia e Nuremberg, jove luxemborgés qu'anava pas finir de faire parlar d'èu. Lo público si pensa que Andoire a perdut lo judici...

Au sèdi de l'OGC Nissa, un fai de letras li son destinat dont lu afogats dau Gim li dion, ò plulèu li escrivon de tot ! Esquasi toi si pensan que lo tecnician nissard es vengut bimbàro !

Mas es pas tot ! Lo dissabta de sera en plaça de metre lu siéu jugaires a la dieta e li dire de s'anar corcar de bòna ora, lo bèu Numa prepauèt ai sieu òmes de sortir bambòchar e si vuar quauqu gòtos ! Si di que lu espòrtius nissards ientrèron tardi en la nuech, segond l'adestraire :

"quora s'en siam tornats : aquelu colhons de bordeles eran ja levats que de la fifa, podion pas durmir alora que nautres avem durmit coma de nistos" plus tardi Numa lo furbo expliquèt, m'au sieu achent provençau la sieu filosofia : "en la vida cau un ganhant e un perdent. Anar en finala èra ja beu, alora au mànco la fèsta l'aviavam ja facha e pi siam manjat la prima toi ensèms ! "

Après aver durmit fins a miegjorn, lu nissards si son vito merendat e dopat m'un gòto de "porto-flip" bevenda a la mòda d'aqueu temp !


Maugrat aquela preparacion originala lu nissards commençan la partida a fond. Andoire dirà : "sus lo terren li era plus que nautres" si juèga pas despi un quart d'ora que lo Gim a ja marcat doi còup...da Carniglia e Nuremberg ! L'adestraire fantaumier avia ja esquasi ganhat la sieu escomessa... Lo Gim finisserà per víncher 5 a 3 ! Lendeman Andoire, Carniglia, Nuremberg e lu autres pilhèran lo tren m'ai suportaires e desfilèron sus l'avenguda de la Victòria, la ben nomenada qu'era negra de monde per veire passar la copa dau 52, e felicitar l'equipa de l'OGC Nissa ren fiera de aussar davant de toi la "mai bèla de toti"­...



 



 


75 vues0 commentaire

Posts récents

Voir tout