Garderem lo tren dei pinhas !
Da Dàvi Assas-Silveri
Garderem lo tren dei pinhas ! Aquel eslògan es mai tornat en l'actualitat maluroament. La pèrditat dei servicis públicos es una fachenda grandassa pèr li gents que li travalhon d'en promier e d'en segond pèr lo teritòri e lu vilatjons de la Contea e de Provença. Aquesta linha dei "Camins de ferre de Provença" qu'a un ròtle major en l'economia de la plana de Var e dau país aut es en dangier. Trens cancelats tra Anòt e Dinha, galaria de Moriers totjorn barrada, la Metropòli qu'es da si mirar de mai en mai la partida dau camin de ferre tra Nissa e lo Plan de Var...
Fa un molon de crucis pèr lu trampinaires de l'empresa.
Siam anats n'en charrar embé Julian Fiore, cap de tren ai camins de ferre despí lo 2017.
• Ti puòs presentar e finda l'entrepresa dont travalhes au cada jorn ?
Siáu Julian Fiore, n'ai 39 sus l'esquina, siáu au jorn d'ancuèi cap de tren ai Camins de ferre de Provença despí lo 2017. Li siáu intrat perque ai un ligam fuòrt embé la linha vist qu'ai creissut tra Nissa e Anòt e ai augut li mieus promieri esperienças professionnali a Anòt a l'ofici de torisme en partenariat embé lu Camins de ferre de Provença justament. Au jorn d'ancuèi lo mieu mestier de cap de tren es d'assegurar lu contròles e li missions de segurtat tant sus li navetas tra Nissa e lo Plan de Var mas finda en lu trens tra Nissa-Dinha e lu trens especials coma aquèu a vapor.
•Cen qu'es la fachenda pèr la linha au jorn d'ancuèi ? Fuòra d'aquò si pòu totjorn sonar "Camins de ferre de Provença" ?
Voei si pòu totjorn sonar ensinda maugrat lo passatge en regia e la gestion da la Region, siam pèr sempre "Camins de ferre de Provença" ligat au pòl grandàs de transpuòrt que toi lo dion "Zou"mas l'entitat es totjorn independenta e governada da la Region m'un consèu d'administracion compauvat d'eligits locaus, dei rapresentants dau personal e d'un rapresentant dei usatgiers. Fa un desenau d'ans que lo transferiment tra "Veolia" e la Region s'es complit. Aquò a permès l'uniformisacion dei prètz m'ai trens dich "T.E.R" e lu bus "Zou". Au principi aviavam pensat embé l'arribada de la Region que li seria una milhora armonisacion e una lògica de desfolopament en favor de la mobilitat dei usatgers que sigue en vesinança de Nissa m'ai navetas mas tanben m'ai espacis ruraus embé cen que sonèm nautres la "auta linha" es a dire la partida en delà dòu Plan de Var pèr cen qu'es dau 06 e dau 04.
E doncas lo 6 d'abriu avèm emparat en consèu d'adminstracion la volentat dei eligits regionaus de cancelar un anar-tornar tra Anòt e Dinha. Valent a dire un tren que si fermerà basta a Anòt da partir dau mes de setembre. Si tracta en fach dei doi promiers trens dau matin !
La rason avançada es la baissa de
frequentacion mas nautres non podèm aderir vist que lu otíls estatísticos son ren fidables ! Dei donadas recampadi mentre la temporada de la còvid e mentre lu embarraments...
Li gents son estadi pèr fuòrça mens mobile. Pèr èstre clar li gents d'Entrevaus, Sant Beneset, Mealhas, Lo Fugeiret non puòdon anar en la sieu prefectura qu'es Dinha de matin. Da partir de setembre lu usatgers arriberàn a Dinha basta a 12 oras 48 ! Pèr donar un isèmple en pròpi un demandaire d'emplec non pòu si rendre a un apontament de matin a Pòl Emplec. Rende impossible toti tòcas administrativi finda. Si trovam embé dei gents talhadi de la sieu segonda vila de prossimitat. Lo tren permete finda un cèrto confuòrt e sensa charrar de l'enjuèc de l'environament !
Li es aparentament una volentat de mobilitat dau govèrn mas a l'invèrs son da barrar li linhetas dau país ! Li es lo cruci de la galaria de Moriers qu'es barrada despí tres ans e que tornerà durbir basta en lo 2024 ! S'enavisam que l'achident en mai de l'encastre de la còvid a favorisat una estrategia de la regia de barrar dei trens sus la "auta linha". Avion ja principiat doi ans fa embé la supression de l'último tren dau dissabta de sera que faia Nissa-Anòt. Toti aqueli dechisions son pilhadi a Marselha d'eligits non atocats da la situacion e fin finala avèm qu'un eligit interessat da la situacion embé Joan-Pau Dàvi, cònsol de Guilherme, bèu just president de la regia e que s'es engatgiat sus la dubertura de la galaria de Moriers dapé lu eligits d'Anòt ó lo retorn dau famós tren dau dissabta mas despí avèm augut doi plans de transpuòrt e ren s'es debanat. Es una lògica dei despensas mèsa en plaça da la Region e la regia. Lo director en plaça es estat pilhat pèr aquò faire. E aquesta supression va, pèr fuòrça, atocar l'emplec !
Es pròpi clar aüra. Se li son mens de trens li serà dei menaires ó dei caps de trens que faràn pas pus mestier maluroament sus la partida dau despartament 04 de la linha. Va atocar finda l'organisacion dei garas, de doi agents passserem a un. Li es un plan de restructuracion que va aparéisser embé dei partenças antichipadi au retir, dei relocalisacions embé dei agents de Dinha que van èstre oblijats de venir travalhar a Nissa.
• E justament, cen qu'es l'avenir pèr toti aqueli gents ?
Va èstre pròpi complicat pèr li gents que van aver bessai la perspectiva de tralaissar l'entrepresa. Li es pas lo meme pesquier d'emplec e lu nuòstres mestiers. Son dei mestiers pròpi específicos vist que li es una soleta linha doncas una soleta formacion que si passa au dedintre. Lo nuòstre mestier non s'empara a l'escòla e si tornam trovar embé dei gents en un dúbi pròpi fuòrt. Nautres si batem pèr lo retorn d'aquèu tren e la dubertura dei garas, de mantenir la continuitat dau servici público e cau pas denembrar que pèr cèrtu vilatges es lo solet mejan de transpuòrt, li es pas pus de bus. Siam pròpi en cruci e avèm mandat una peticion sus li rets e que fèm firmar en lu trens finda. Fèm de sensibilisacion dapé lu viatjaires e toti li gents que son estacats en aquesta linha. Aquèu tren es un monument dau patrimòni Nissard. La nuòstra particularitat es d'èstre un tren de linha e un tren torístico. Fa part dau decòr e avèm paur pèr l'avenir m'un autre combat da menar en li annadas que venon embé la Metropòli de Nissa qu'es da agachar la partida de la linha de la plana de Var.
Doncas tot aquò mena a dei demandas ! Se la Metropòli si pilhèsse la linha bassa, cen que faria la Region pèr la auta linha ?
Va s'engatgiar tot l'an ó trasformar aquesta partida basta en linha torística ? Au prejudici de la nuòstra mission de servici público, pèr lo transpuòrt dei trampinaires, dei escolans, liceans...
E tot cen qu'es ligat a l'activitat professionala embé lo servici de messatgeria qu'avèm finda pèr li entrepresas que son sus la "auta linha" !
La peticion sus la tela a trepassat li 9000 firmadas e lo combat contunha.
