Finda ieu sieu vert… de ràbia !

Da Jouan – Reinat Lionelli


Ahura si fica de vert dapertout ! Es devengut couma la darriera cauva à la moda.





Son puleu de pastroui de saloun per aquelu que si senton investit d’una nova crousada divina, mi sembla ! Cadun parla de sauvà la planeta.Cadun à lou sieu metòdou. En toui lu caire dòu nouostre viei mounde, en toui li plan dei nouostri soucietà de coumunicacioun, s’en fica d’aquèstou coulou ! En un mot de vert s’en manja à touti li sauça.


Acò mi fa pensà au nouostre pìstou, vert eu tamben. Defet couma si di à un moument en la peça de teatre « fai calà » da Georgi Delrieu, « qu si fica tra mourtié e mouledou deven pìstou » ! Si faren propi pistà finda nautre, souta lu còu dei nouostre mouledou se countinuen à fa bus en si pensan qu’es l’autre lou gros brutesc. Bla bla bla couma diguet la pichouna Greta Thunberg.Pastroui e pastroui e pastroui, couma si canta finda ! Basta en aqueli palabra que lou mot pilha pura lou sieu sourgent souta d’un bel aubre en lu vilage african, lou bres de l’umanità ! Lou rai de la vida si desséca. Dòu bres à la caissa, la blouca es bessai bloucada per omo sapiens rementus !


En aquella nova crousada li son couma de raça de papa que n’en vouolon mandà en aquella santa guerra, couma lou faìon lu papa dòu mèdio- èvou me touta la sieu ipoucrisia. Couma lu sieu predecessour, s’asperon bessai que la pauruegna moundiala si sacrifisserà e patisserà tournamai dòu fan e dòu set, couma aquelu mesquin proumié crousat embriagat de bouoni paraula !

Ma ahura d’unu malerous son ja counstrech tra lou mounde de basta si roulhà lou sieu pichin tros de pan staìs dòu cadà jou, coura, en lou fra temp, lu nouveu chivalié s’en mounton si passejà dai estéla en si pilhant de bagne de champagne o en si jitant de mouostra de lùssou sus lou moure !

Anas toui en galera me la sieu benedicioun !


Lou dieu baoubàbou recounouisserà lu sieu !

Sien à la crousada dei camin tra lou pèjou e lou marit ma degun sembla s’en avisà emmascat que sien dai màgou dòu gros PAF, aquèu mirage televisual !

Cada an milanta pan de gaudina s’en parton en fum da la man de l’ome, que sigue dòu menfoutìsmou, per cahinaria, cupidità o per bestialità !


Cada an s’empouisounen lou respir me li vouotura, nau de coumerce li mai bruti

o avioun que si pilhen souventi fes per basta s’anà abasanì lou cùou dapé d’una pesquiera au soump dòu mounde !

Acò marca ! Soubretout per ficà cauqui foto sus lou nouostre bari « faça de bouc », aloura qu’aven lou parrié au nouostre.

En mar si pesca mai de rementa que de pei, e n’en passi !


Sien squasi toui ecolò aloura que si voulen manjà de cerieia en iver !

Cadun pousquesse pilhà counciença dòu chaple que n’arriba en si regagen en un mirai en plaça de s’aluechà l’ ambourìgou !

Couma lu nouostre viei, que si pensavon pas d’estre vert, si lavessian lou moure m’un simple saboun de marsilha, de preferença,

en plaça de si pilhà de lach per lou cor countengut en de flascoun de plàsticou vengut de l’autre coustà dòu mounde en super tanker. Couma élu bregalhessian pas lou lume, aqueli pichini ecounoumia de candella que li si trufen ahura o encara anessian à l’escola à pen per fa cinque cent mètre. Parié per si croumpà lou pan.

Tout acò son de pichini cauva, ma sus mai de vuech milliart d’uman es touplen !

Couma si diia d’un temp ,cau manjà per vieure ma ren vieure per manjà.Au jou d’encuei si fen petà la pansa à n’en devenì una generacioun de bòdou encoulestiroulisat !


Basta au soubre-counsume vantat e abutat da de reclama que nen fan pantalhà e nen vouolon fa croumpà mai de cenque n’aven da besoun. Bessai per embarlugà lu vesin que fan lou parrié. Qu’asperon lu nouostre cacan per bandì aquelli publicità, obra dòu trouble tantatour ?

Qu son aquelu predicatour, chica strassa vert, que s’en meton plen li bourniera o que fan de poulìtica basta per li sieu cariera o la sieu glòria ?

Parlaìssa de bada ! Qu son aquelu

« grünen » tedesque que noun vouolon dòu nuclear (s’en pau discutre dòu segur d’acò !) ma que fan virà li sieu centrala m’au carboun o que croumpon la sieu energia en França, que ella es una puissança nucleària ?

L’aria non a de counfin bessai?

Sinqu’es aquella Europa que vau toui n’en fa menà de vouotura elétriqui aloura qu’es recounouissut sientificament que per amourtì la sieu traça ecouloùgica cau roulà denant doui cent mille kilometre.

Quant li sien ahura à menà una vouotura que n’a autant au sieu countur ?

Quant de centrala nucleària o à carboun caurà bastì per n’en pouorge touta aquella energia que n’en farà mestié ?

Acò mi sembla mai estre souta l’influença,

d ’escoundihoun, dai escapoùchou, lu « lobby » couma li dihon, en lu mitan autourisat. De judici ? Minga !


Despì qu’aven lou Poutina en l’uei, e eu n’a en lou nas, ahura que n’a serrat lou luquet dòu sieu gas rùssou, voulen croumpà aquéu dei american que n’aven la necessità vitala ma que elu lou ti fan gislcà à grand còu de dinamita en ti faguent tout petà, roca, sourgent, aubre, flume, denant de lou nen pouorge tra mar dins de nau li mai brutesqui que sigon ! Que lu « grünen » duermon ben pai sus li sieu doui aurilla de balourt, auran da segur lou cùou ben au caut aquèstou iver !

Serìa ben que lu mestre dòu mounde, aquelu signour peoui revengut, dounesson l’isemple denant de nen fa si serrà la talhola sus li nouostri pansa ben grassi que n’aurion propi da besoun à nautre lu estaient dei pais ric !

Basta ! Dòu bouon ! Lu temp (lou temp finda) chanjon mai vìtou que lou si pensen ! Borni es aqueu que noun vau veire !

D’aquì pauc li seren tròu ! Couma si farà la limitacioun dòu génere uman ?

Bessai que la misèria dei paìs dessecat staierà paiament darrié li sieu ligna en asperant que lou fan e lou set li baresson plan planin li parpella à la sieu gent loucala ?

Li manderen li nouostri preguiera bravi ànima ! Qu déciderà de tout acò ? La nova noublessa investida dòu rei doular $ ? Si countrolerà li naissença ? Me l’ajuda de tanta Chiquetta, o lou countrari, lou dai de la guerra, de la famina … veire de nouveli peste, aurà bessai rasoun dei poupulacioun devengudi tròu numerouhi ?

Caucaren si farà e serà pas bouon,pouden n’en estre segur !

Ma sinqu’es segur, soubretout, es que aquelu ricas que si passejon en fuada, damoun tra li estéla, nen pisseran soubre !

Bouona bambocha en toui ! Que si faguen encà petà la pansa en asperant de si fa petà lou mourre. Bouon proun vi fague !


*PAF, per aquelu, couma ieu, que si penson toujou à mau, vau dire paisage audiovisual françes.


Empafat : Aquelu que si suerbon d’infourmacioun, ben poulidi o que sègon li bouoni recoumendacioun dei gouvèrnou !

( Sourgent (lachié) : lu gros « robert » !)


 




38 vues0 commentaire

Posts récents

Voir tout