Eusébi da Eusébi
Da Dàvi Assas-Silveri
Carneval arriba ! Li siam ! Intram au plan-planin en aqueu mes de febrier e m'es venguda l'envuèia de tractar un chícol d'un artista que marquèt la fèsta de l'inversion en la sieu rapresentacion mas pas solament !
Mas en tant vorrii mi consacrar ai principis de Jànmarc Eusébi e pusleu ai sieus promieri bandas dessenhadi. Lo Eusébi d'umor brut, aqueu que s'es esperlecat da espandir l'encantament dau gràfiti de cagadors a la debuta de la sieu rica carriera e que lo menerà fins a Carneval es ver mas finda a d'autru projècts numerós. Pastrolherem finda m'au Jacquo Lalli per si fermar prechisament sobre la temporada de la creacion d'un jornal de còntra cultura a l'escala nacionala : « Barre à mine » per lo qual conoissèron un rup d'aventuras e finda un fai d'achidents judiciaris en li annadas noranta.
Totun, perqué ai sonat aqueu modèst article per tractar d'un artista grandàs d'en Bellanda « Eusébi da Eusébi » ? Aquò es una demanda né ! En acòrdi m'au sieu enfant Rafeu, que rengràci en pròpi per l'achès en d'arquivas dont sieu tombat sus de daururas dau buòn, proverai una revirada de la biogràfia fargada d'Eusébi e que ven acabar l'album « Cons d'hommes » per fins de tornar trovar lo ment d'aquel artista « trash », pur produch dei annadas vuetanta.
Enfant de la Contea nuòstra, dau vilatge de Barver mai prechisament, Jànmarc Eusébi fa mirar pròpi vito lu sieus gaubes de dessenhaire. Da jove, a pena au collègi, si fa aremarcar dai sieus caricàturas e deven finda un dei trobaires e l'illustrator en cap de la banda pòp que si sonerà « Shopping », m'au sieu amic Joan-Miqueu Spagnol, que conoisserà un suchès internacional en lo
sieu vilatge. Creissut m'au jornal satírico « Hara Kiri » dau Professor Choron e François Cavanna, Eusébi si garça naturalament en li sieus promieri bandas dessenhadi.
D'en promier « Cons d'hommes » sortit en lo 1986. Aquel album vi garça en cen que si fa de mai pèjor. Es societal, brut, porcachon, satírico, soventifes a la brua, clafit de chuòspas e de chautrons que la si fan buòna en la crapula e negat de bícols e de mossas a la lònga dei pàginas. Un brave programa beu punk, ai un afèct especial emb aquel esperit sabètz, e si pòu ja endevinar en lo tractament dai sieus dessenhs lu premicis dau sieu estile tant característico e carnavalenc. Eusébi nen puòrge un viatge en li prefonditats de l'ànima umana que dau segur arramba de problemàticas societali mai serioï que marca li annadas vuetanta. Dròga, arcòl, racisme, religion, SIDA, degun es espranhat e manda l'agacha de l'artista sobre la sieu època.
En compèndi « Cons d'hommes » es un racun de la sieu filosofia sensuala e si pòu ja mirar li influenças « trash-underground » dei « Freak's brothers », « Gros dégeulasse » e finda «Raoul teigneux ».
Lo segond album sortit en lo 1988
« Caresse d'ecorcheur » si marquerà en la dralha pariera. Per sempre en lo brut, siam un còup de mai trasportat au fin fond de l'escoladura de la raça umana. Lo cau dire es simplament abocant e, en lo fra-temps, trebolant qu'es ren de creire !
Aüra basta. Es l'ora de laissar plaça a l'artista per fins d'acapir qu èra Jànmarc Eusébi en pròpi :
« Jànmarc Eusébi si naisse lo 15 de febrier dau 1962 a Nissa...
Da pichon si creisse en lo païs gavuòt dont lo sieu païsan de paigrand li bandisse dau buòn de cavaucar l'ae a l'ora dau penec.
Vida de campanha, talhas de fens, laura, culhida, l'amontanhage... En lo 1967 crida seba e dechida d'encaminar d'estudis a l'escòla comunala de Barver.
12 annadas mai tardi, Eusébi obten lo sieu BAC de filosofia. En guisa de regal son paire li descantona una ocasion estra de vacança a la nèu : Diaul blu en Savòia... Alhà, tra doi igloos, farà l'aprendissatge dei jòias simpli que provedisse la vida tra baudos : arcòl, tabac, chuòspas e marijuana.
Per la sieu andana esemplària e sota l'escampa de lo rengraciar de la sieu ajuda a l'ornament dau gimnasi per lo balèti dau regiment, Eusébi ganha 30 jorns, pension tota, en servici neurològico a l'espitau dei genettes a Lion.
Guèrra passada, fuòrt de la sieu esperiença en nevròsi si marca en psicologia a la farcultat de letras...
Bravament rengraciat dai moussurs dei Scienças Umani, si marca alora dai Arts decoratius !
Quinze jorns mai tardi Diu en pròpi li parla e li ditz : « Fugisse... as encara lo temps ! »
Eusébi s'esecuta e mentre doi annadas adoba lu sieus pecats en faguent un centenau de planchas de bandas dessenhadi.
Pura aquelu ramassa-buas d'editors non vuòlon ren saupre d'eu.
Alora deven vegetarian e si bate barona en recerca d'un trampin. Pertocat da la graça divina d'una vesprada d'auton dau 1984, deven afichista dau compte de l'Accion Culturala a Nissa.
Pis arriban li revistas bruti, lo grafisme de reclama, la produccion de concèrts e per acabar la banda dessenhada a l'umor brut !
Un ponch sobre lo qual si pòu ren dire ! Eusébi non travalha jamai beu choc... ! »
