Entrevista e amploada-Loïc Borriglione­­


 

La Contea de Nissa es devenguda bèla campiona dau monde de Morra !

E voei a l'ocasion dau "Mourramoundo" organisat a Bessans en Savòia, aquel eveniment recampèt doi cents jugaires venguts dau Val d'Aosta, de Pimont,

de Sardinha, dau Friol, dau Trentin, d' Eslovènia, de Croàcia, d'Aragon,

de Catalonha, de Còrsega, de Savòia e dau segur de la Contea de Nissa.


Avèm garçat quauqui demandas a Loïc Borriglione bèu just campion dau monde de morra !



• Ti puòs presentar, de dont vènes e lo tieu percors ?


Mi suòni Loïc Borriglione, siáu de Lantosca d'en Vesubía e ai fach lo mieu licèu a Paul Augier denant d'anar devers la contabilitat après lo bac. Siáu un defensor enfuriat de la cultura nissarda que sigue a regard de la lenga, lu juècs, la dança, lu arts e la coïna perqué ai creissut en la tradicion nissarda m'ai mieus doi parents.


• Coma as descubert aquèu juèc de la morra ?


Ai descubert la morra quora n'avii dètz sus l'esquina au Babasoc davant la Cròta de la torre. Au principi non volii jugar que li gents mi mandavan l'espavent. Mon paire a finit da m'emparar li chifras e li règolas e fin finala n'en siáu devengut afogat d'aquèu juèc. Ai partichipat ai concors pi e ai rescontrat toi lu jugaires de la Contea de Nissa que son au jorn d'ancuèi d'amics en pròpi. En lo 2014 ai ganhat lo mieu promier campionat regional mentre la mieu segonda partichipacion e ai pilhat part pèr sempre a cada concors e muòstras gauch au mieu amor dau juèc.


• Crèsi que siás lo president de l'associacion "La mourra dei quatre cantoun", nen puòs la presentar e li acions engatjadi ?


Aquesta associacion es estada creada en lo 1999 da Pascau Colletta e lu sieus amics de Nissa, Pierlàs, Tièri e Ilonso. La tècola foguèt de tornar au jorn d'ancuèi aquèu juèc de la morra que s'èra totplen perdut. Lo nom de l'associacion rapresenta lu quatre cantons Tièri, Ilonso, Pierlàs e Lieucha qu'environan la cima dei quatre cantons de la valada de Tinèa. Organisam dei muòstras a l'ocasion dei fèstas locali (Lu Mai d'en Cimiès, Carnevale, festin en lu vilatges, Festivous a Ilonso) mas finda un campionat regional, lo "Gavouòt Mourra Tour" que si debana a Levens, Tièri, Ilonso e Pierlàs. Partichipam finda ai eveniments internacionals coma lo "Mourramondo" cada an en lo qual rapresentam la Contea de Nissa. Enfin partichipam en de conferéncias en li facultats de lenga a pena que lo podèm.



• Aquest an foguèt organisat lo "Mourramondo" en Savòia. Nen puòs presentar aquel eveniment e nos espligar l'organisacion?

Aquel eveniment es organisat cada an en un luèc desparier. (Sardinha, Catalonha,

Còrsega, Savòia, Contea de Nissa, Aragon)

Recampa l'ensèms dei païs e mai especialament lu regions que juegan a la morra. (Val d'Aosta, Pimont, Sardinha, Friol, Trentin, Eslovènia, Croàcia, Aragon, Catalonha, Còrsega, Savòia, Contea de Nissa)

Li es normalament mai de 80 chormas que partichipan en aquel eveniment pèr fins de defendre la sieu region. S'organisa embé de grops en lu quals lu jugaires s'afrontan. Lu quatre promiers passan en 16ena de finala e continuan tant que ganhan. En Savòia un tornèu consolant es estat organisat pèr aquelu qu'an perdut au promier gíro. Tantotun, a la lònga d'aquel eveniment, la morra non es lo solet element. D'efèct lo canton fa crida dei sieus tradicions e li son de bancs de produchs dau païs, dei bandas de músicas tradicionali e finda dei conferéncias. La tòca d'aquel eveniment, dau segur que li sigue competitiu, esta un remirable rescòntre m'ai amics alentorn de la morra.


­­• La Contea de Nissa foguèt bèla rapresentada mentre aquel eveniment. Quant de chormas engatjadi e embé qu ?


Mentre aquela edicion eravam dotze jugairitz e jugaires sigue 6 chormas : Ayel Briceno e Joel Defrancheschi, Melissa Hank e Patric Mari, Corina Giordan e Tièri Puons, Alexie e Alan Cauvin, Pascau Colletta e ieu e Matiu Fabre e una jugairitz de Savòia.



• Siatz doncas lu campions dau monde nòus de morra, nen puòs cuntar lo percors e presentar lo tieu compaire ?


Lo mieu compaire Pacau Colletta es magistre a Levens. Ven d'Ilonso en Tinèa, a pèr sempre banhat en la cultura nissarda e a descubert la morra da jove en lo sieu vilatge. Es lo fondator de l'associacion nuòstra e trasmes la morra ai sieus escolans. A costat d'aquò escriu un molonàs de libres sobre lo sieu vilatge e la sieu valada e finda de libres dai pichoi. Es lo jugaire que m'a fach creisse a la lònga dau mieu percors en la morra e es estat pèr sempre lo mieu compaire au "Mourramondo" levat dau 2020. Siáu pròpi fier d'aver ganhat emb èu perque l'asperavam despí un brave moment.


• Cen que rapresenta pèr tu un prèmi de campion dau monde de morra ?


Pèr ieu, ganhar aquèu prèmi es pròpi un objectiu de vida, un acabament de ieu en pròpi e es ren de lo dire ! La morra es pròpi una part grandassa de la mieu vida. Quora juegui, senti que mi liberi, qu'analisi, que doni tot cen qu'ai en lo piech mas finda que plasir de descurbir una passion e un gaube pèr quaucaren en la sieu vida. Pèr ieu es lo result d'un lòng travalh perqué ai totjorn mirat li partidas dei mieus adversaris, analisat lo mieu juèc e vei que tot aquò a pagat, e d'aquò n'en farai li mieus Calènas.



• Cen que serian segon tu li ac­­ions da metre en plaça pèr una trasmission eficaça d'aquèu juèc dapé lu mai joves ?

Mi pensi que cauria intervenir mai en li escòlas mas lo temps es soventifes pròpi complicat da trovar. Siáu urós de veire que cèrtu professors coma Patrici Arnaudo ò Olivier Pasquetti presentan aquèu juèc ai sieus estudiants.


• Cen que son li datas da venir pèr l'associacion "La mourra dei quatre cantoun" ?


Devem faire un concors a Ilonso mentre lo "Festivous" lo 21 d'aost dau 2022 e una muòstra a Lantosca lo 4 de setembre dau 2022. D'ivèrn es puslèu quiet si tornem trovar l'estiu que ven en Sardinha pèr lo "Mourramondo" mas finda en lu vilatges pèr lo nuòstre campionat.


­• Lo mòt de la fin ?


Tenii basta da dire que la morra e ieu es un dei mai bèi rescòntres de la mieu vida e n'ai qu'un solet desideri ; qu'aquèu juèc posquèsse si mantenir encara 100 ans e subla.





67 vues0 commentaire

Posts récents

Voir tout