Emiliano souta l’aiga

Da Lou Borzoï


Aves legiut lou titoulou ? Ai la vouòstr’atenssioun ? Ben.


A la debuta, avii previst de faire una revirada coumpleta dòu coumunicat de la populari sud. Ma, fin finalà, la rabia passada, mi sieu dich que seria caucaren de countra-proudutieu. E pas francamen ouriginale de repilhà un testou escriç da caucun d’autre. Sierve a ren tant per lou Peolh couma per ieu. Ma, levada l’impourtanssa en lou mounde doù foot e de la poulìtica, soun li reassioun dei Nissart tra elu che m’an dounat envueia de racà tout’una semana.


Aves ben capit, anen parlà d’un’istòria à l’ourigina d’una guerra mai impourtanta que lou faç dòu XVe cors o «l’operassioun espassiala» en Ucrèna.


Denant de develoupà lou mieu argumentari anen faire una pichina « mesa en countest » per li gent que soun pas afougadi de juec de bala. Lou 11 de mai passat, lou kop de la populari Sud, group d’ultras dòu nouòstre tant aimat Gym, a mandat un cant que parlava dòu jugaire de Nanta, tragicamen mouòrt en un accident d’avioun en 2019, Emiliano Sala. Es aqui ch’arriba la tempesta de merda. Cen ch’era, per li gent che counouisson lou ment ultra, coum’una marrida menchounada mau plassada (pouden parlà d’umour negre) a pilhat de prouporssioun de l’autre mounde.


Au noum de la «mourala», per paur dòu «bad buzz» o, e es nourmal, per rapouòrt me la sensibilità dei gent en aqueu sugiet, media, club, counsou (...) e Nissart an coundanat lou cant. Segur lou lendeman era pegiou e cadun es anat dòu sieu coumentari, lou club, la liga, Paris, Oran, New-York e autre falabrac. Vergougna e counsternassioun.


En acheu çiaple ai gardat en memòria doui frasa de cada pounch de vist :


- Christophe Galtier lou menaire dau Gym qu’a dich « si di che li tribuna soun lou reflet de la nouòstra soussieta, aloura sian en la merda ! ». Va ben.

- La Populari ella, parla «d’un’errour». Che lou segount gradou fa parte de la mentalità ultra e de la nouòstra nissardità. « M‘en bati sieu nissart, simbòlou de l’autoderisioun e de l’esprit desinvolte » dei gent de la Countea.


Galtier s’es enganat. Lu ultra soun pas lou reflès de la soussietà atuala, es acheu d’un soussietà che noun esista plus. Lou ment dei annadi 80-90 a l’epoca doun cadun poudia dire sen che voulia sensa si faire empicà en publicou a plus la sieu plassa achi. Passat revolut. E es aloura l’incarnassioun dei annadi 2010-2020 douminadi per lou « wokisme » e l’universalisme. Doui estremisme qui si rescontron en un estadi. Achela pì ! Sian pas tant « Charlie » ch’acò ! Ma es finda la soussietà nissarda. Sian tougiou tra nautre a si mangià lou mourre per un ahì o un noun e soun li fourastié que gagnon à la fin de la nouòstra divisioun. Lu nissart soun estirat tra tradissioun e moudernità. Doun deven anà sensa perdre la nouòstr’identità ?


Per noun mi garroulhà me lu doui camp vi respounderai che cadun a rasoun, cadun a tort en l’afaire. E laissi lou darnié mot a un mouòrt : lou famous Umberto Ecco qu’a dich :

« I social media danno diritto di parola a legioni di imbecilli. Parlavano solo al bar dopo un bicchiere di vino, senza danneggiare la collettività. Venivano subito messi a tacere, mentre ora hanno lo stesso diritto di parola di un Premio Nobel. È l'invasione degli imbecilli ».

Ounour, Fedelità.


 



51 vues0 commentaire

Posts récents

Voir tout