Chapachouc e Avengers

Tantiflada dòu cabanoun


Barba Rabatin e lou siéu coumpaire Gé Tartàia, doui bravi ànima de Bellanda, soci de la proumier’oura dòu cabanoun dei esucura-gotou, luèc de souciabilità famous au soubran de la couòla, fouguèron cargat de la missioun impourtantìssima de l’alestimen de l’estocaficada dòu divendre.



 


Aquo es pas pèr si rire sabès ! Es l’aussamen souciau !

Una pressioun giganta esquicha l’esquina dei doui amic e d’ahura en avant si cau ren mancà ! Propi !


Vequì lu nouòstre doui bellandairenc à bordou de « l’espress » dau cabanoun, croumpat à l’EDF, que si pòu toujou mirà lu ancian pega-soulet de doui cousta de la màquina e si devinesse meme que fouguèt blua d’un temps. Camina que camineras, l’autoumòbila s’en calèt de la quieta couòla plan-planin pèr anà faire li croumpa.


En davau de la couòla, trepassant lo dàssi dau coustat de Bouòn Viage pèr fin d’intrà en «la vila d’en davau», lu vequì proch de l’espitau San Roc au quartié de la Bourgada pèr prouvà de si parcà e countinuà à pen fin au Babasouk. Es cen que fouguèt previst dòu principi mà m’ai doui bochaire la fachenda fa de longa tatà. Couma se la fatalità lu perseguèsse au cada jou. Noun es la fatalità que s’aventèt sobre d’èlu mà ben la miserìa en propi aquèu dilun de genouié. Lu doui mesquin s’atrovèron esquichat n’un tap gigant que noun sai. Achident ! Lou Mèstre «dòu paìs vesin» fouguèt counvidat dai pichin signour loucau pèr inaugurà un ost nòu ai chapachouc. La Bourgada davant l’espitau fouguèt negra de mounde e la pichina « espress » fermada aquì, au bèu mitan de la carriera. Minga mejan d’anà ni en davant ni en darrié ! Paure crìstou ! Paure Rabatin e Tartàia ! Couma lamp bramant arribèt lou counvidat dòu jou m’un fai de veitura embé touta la siéu garda procha. Sabès es pas degun aquèu ! Gouvernadour proumié, cap de «la vila d’en davau», m’ai siéu signour aribèron mourre en terra pèr fin de li passà brossa e l’aculhì embé tout l’espatuf que si dèu...


Fermat pèr fermat cen que voulès faire ? La si pilhà de paciença e augurà que tout aquèu carnevale si passerà vìtou-vìtou...


E be vai ! Doui gìrou dòu relori e li siguèron toujou lu doui mesquin !

Après tout un rup de maniera, de rengraciamen, d’un passa carriera d’arlèri dòu cantoun, de pehouì revengut dòu quartié, quoura si metèron toui de jijouòla e que saludèron lu bourious dòu paìs vesin, arribèt lou temps dau gouvernadour de faire lou bùlou davant de toui. D’un’andana assegurada s’avançèt dòu purpitou mascarat dai coulou de l’oucupant en lou siéu coustume talhat da Sclavo, sartre arianenc famous, pèr l’oucasioun. Darrié d’èu si pousquèt counouisse toui lu nèsci, faiòu, fùrbou, flatur, vanaglourious e pouòrta valisa de tota merç dòu paìs qu’auguèron just lou drech de picà dei man e souguigne pèr fin de faire bouòn mourrin davant lou Mèstre e la televisioun. Dòu segur qu’es lou moumentoun pèr si faire badà ! E pi si di que n’i a qu’an finit da denedà m’ai pèi au fount dòu pouòrt aloura sabès... cadun si fa mèfi au jou d’ancuèi... mà chùtou lou vi vendi couma lou m’an vendut... Passan !


Gouvernadour proumié coumençèt­­ la sieu parlaìssa ensin :

« Iéu, Gouvernadour de la vila d’en davau, anounçi aquèu jou la creacioun d’un ost dai fouòrça d’oucupacioun mà finda pèr lu chapachouc de la coumuna. Proujèt estimat à circa dei 220 milioun de merenguin, valent à dire pas grand cauva vist qu’anen raubà lu pìtou d’en cadun souta fourma d’impouòst oubligatori, anen pas croumpà à tàia e pi aquì si trata ren d’afaire doun pagan embé de mouneda d’Arlequin ! Mas noun vi faire de bila, aquò es basta un detaioun sabès, anen vi metre un «# I love chapachouc» gigantàs en plaça dòu teatre e cadun n’en serà alegre. Aquel ost grandàs serà lest à circa dòu 2025… vous ai toui capit... à l’an que ven... » e lou patin e lou coufin.

Cau dire que Gouvernadour faguèt li sieu classa quoura fouguèt bèu campioun de auta coumpeticioun de Mounoupòli en la siéu jouventura. Es ensin qu’emparèt da croumpà, prefoundà, vendre la siéu vila e la si faire bouòna en lou paìsage poulìticou. Un ome de redris e de judici…


Bouòn, pèr vi faire un brave coumpendi que dòu senoun deman li sien encara, soubretout se siguèsse lou brave Tartàia que la vi cuntarìa l’istourieta, aquèu proujèt va estre una cauva de l’autre mounde ! 50 000 mètre carat pèr faire guerra ai scapuchou de la vila m’un centre « ultravision » ! Vouei vouei, avès ben liejut ! Propi lu Avengers que van estre assoustat n’aquesta maiounassa enfin... es cen que si capissèt lo Gé, qu’en passant e lou cau dire, a la mai bella coulecioun dei revista « Strange » de tout Bellanda à maioun e que s’arrestèt meme lou moumen dòu temps de tartaià quoura sentèt aquesta nova grandassa. Porca malur ! La grana Visioun1 en «la vila de davau» ! Es quaucaren aquò ! Un Avengers famous vesin dòu nouòstre.

D’un temps faguèron venì lou club Dorothée m’ai Biouman mà aquì Gouvernadour e la siéu coumbrìcoula veguèron grandàs !

Aquò fouguèt lou poumpoun, la cerièia sus lou pastissoun ! Lou suchès pica à la fenestra. Lou cruci de l’espaventa pèr carriera n’es qu’una remembrença escounduda au fin fount dòu pous dòu diau ! Sian toui à la sousta : «Embé Gouvernadour es pas parié !» , dòu bouòn ! E diau ! Nourmal que ! Pèr estre en lu pichin papié de l’oucupant cau metre lu mejan. Es finit de s’amusà, de si rire da si picà l’embourigou. Lu làdrou de la ciéuta soutrana estaran escoundut e li serà una càmera pèr tenì à ment cad’abitant ! Es pas pus «la vila de davau» mà propi Minority Report e en lou role de l’aganta manigordou : Gouvernadour proumié en propi…


La foutougràfia pèr la reclama dòu partit ùnicou m’ai doui pichoui vestit en vielh mandada ai pèi e li siguèt pas pus degun pèr carriera. La Bourgada fouguèt vuelhada d’un còu soulet. Lu cacan si mesclon gaire’mé la poublacioun e partèron toui faire bambòcha’mé la delegacioun dòu Mèstre dòu paìs vesin n’una osteria famouha d’en riba seneca.


Pèr tournà ai nouòstre coumpaire, aquesta carnevalada un còu acabada, fouguèt jà l’oura de tournà au cabanoun e sensa merlussa pèr alestì cen que venguèron cercà dau principi mà m’au cascavèu clafit de pantai. Que bella vila aquela d’en davau !


«Caurà pilhà nova dòu Capitan Nissa» si diguèron Rabatin e Tartàia. Que despì que metèt lou grand Mèstre de Punta del Este à l’oumbra après d’una batesta enrabiada, si faguèt quist lou baudou. Lou veguèron ben pèr lou darrié councours tripleta FSGT mà fa un brave moumen !

Mà aquo es de figa d’un autre cavagnòu...

Vague, bouòna pesca en toui e viva lu Avengers.





70 vues0 commentaire

Posts récents

Voir tout