Camalar

Da Djé Balèti


Lo Djé Balèti es un Nissard que viu a Tolosa despí manti annadas e n'i a de jorns dont la nostalgia dau païs nissard li reven en plen morre. Alora, per si passar la babaròta, Djé parla m'au sieu amic Tòni lo Tolosenc dai sieus sovenirs nissards, mas, lo problema es que n'i a totjorn un mòt que lo Tòni capisse pas perqué si ditz ren a Tolosa. Alora es l'ocasion de l'espligar...



Ancuèi siáu a Tolosa e fa solèu ! O miracle !

Aquò mi dona l’envuèia de camalar la mieu pichona sobre la mobileta.

- E cen que vòu dire camalar ?

- O miseria ! Foguères deseritat tu ! As ren viscut en la tieu joventura.

Camalar, cambalar, chalar, aquò ti di ren ??? Camalar la calinhera sobre la petroleta per anar s’embalhar en li cuòlas, es un moment d’eternitat de l’adolescéncia quora as lu berris en lo vent, lo casco au braç, lo pòt Ninja descalaminat, li gomas gonfladi da petar, una sèla per doi sobre lo 103 SP o lo Piaggio.

La pichona ti ten a la tieu vida, li sieus polidi cambas a man drecha e seneca, lo sieu piech pegat a la tieu esquina, sentes lo tieu couor espetar en lo rastèu, l’odor de ferígola e d’òli de petroleta.

La bèla ti donava una baieta a jaba o mai, lo temp de si dire "ti vuòli de ben" e calia calar la cuòla per la tornar a la sieu mamà.

Era com’acò en li annadas vuetanta

Sabi ren coma es au jorn d'ancuèi ?


 

Donas mi ‘na mobileta,

Un vielh Ciao 103 SP

Vespa o una Lambretta

'Bé sèla dobla siouplete

Per camalar la mieu calinhera

Anar damont sobre la cuòla

Per s’embalhar sota l’ombreta

D’un olivier en l’èrba fuòla

Lo miralh de la mar

Rebaterà lo nuòstr’amour

Ben avant que l’amar

Si manja lu "totjorn"



28 vues0 commentaire

Posts récents

Voir tout