Benvengut sus la pàgina libra de’n Bellanda.Benvengut en Lo Peolh Revengut.
Dernière mise à jour : 4 févr. 2022
Un mòt, un solet, l’envuèia. Aquèu nom feminin que porria faire lo compèndi d’aquèu projèct nòu.
L’envuèia de si radunar alentorn d’un projèct escrich e de prepauvar un blòg, una pàgina libra sota forma de jornal pèr fins d’escriure.
Aí, escriure en aquesta lenga qu’es lo motur compartit da la combrícola dau Peolh Revengut.
L’envuèia de si faire plasir sensa fla-fla n’una libertat totala en mandant au buòsc li garolhas gràfiqui. Cadun ven emé la sieua e la sieu envuèia e pis pas mai !
L’envuèia de si levar d’aquesta gàbia, postalina mensoneguiera de la « Côte d’Azur » e de la lieta folclòrica de la cultura nuòstra.
L’envuèia de cascalhar la verruga de Rauba Capèu e de metre una poncha pen ai centralismes de tota merç, ai visions estrechi que vorrian ficar la lenga n’un musèu.
L’envuèia de faire una lauda apontelada a la pressa dialectala dau principi dau sècolo XX en lo font, la forma e ensin tornar trovar aquèu ment de libertat que negava li edicions d’aquelu jornals tant numerós au nuòstre.
L’envuèia de cascalhar lu peolhs revenguts que vorriàn caminar e escupir sus la lenga nuòstra.
L’envuèia de s’asostar au cròç de la man doça de Bellanda, espaci pantaiat da la creacion nissarda e de la còntra cultura.
L’envuèia d’existir sensa si mastegar lo cascavèu e de charrar de tot en lenga.
L’envuèia de’n cadun d’aquesta combrícola de menar quaucaren m’au sieu gaube e la sieu vista.
Ensin troveretz cada doi mes una edicion dau Peolh Revengut sus lo blòg ò sobre la pàgina Facebook.
Non esitetz da vos abonar, es una maniera de nen sostenir un chícol.
L’edicion promiera es prevista pèr lo mes de febrier mas d’aquí en là vi tenem au fiu.
Es en lo Peolh revengut que si cerca de nieras.
Viva en toi.
