Adiu barraca !

Da Dàvi Assas-Silveri


Dau costat de Manhan li es un cabanon pichin que cadun conoisse.

Enfin, li èra puslèu vist que la barraca "Da Felis" si va chanjar de proprietaris...

Un luèc de sociabilitat de mai que va barrar. Mai qu'un cabanon es una institucion dau

quartier, una sinha pèr d'uni e d'unu que s'esperlecavan m'ai Pan Banhats de la familha Allais present aquí despí lo 1966...


Un cabanon istòrico Nissard !

Foguèt lo paire de Joan-Carlo, Felis Allais, que lo crompèt en lo quartier Manhan, just bèu vesin de la Passejada dei Inglés. E víto-víto devenguèt una referença pèr l'Especialitat Nissarda : lo Pan Banhat !


Es doncas 56 annadas après que l'enfant de Felis, Joan-Carlo, e la sieu frema Maria devon rendre li claus lo 30 de junh dau 2022. Dechision votada dau consèu munichipal de Nissa en seguida de la mèsa en concurréncia de la botiga. Vi podètz testardear la rutada en pròpi pèr aquèu qu'es escasi naissut au dedintrte dau cabanon !


La bandiera a jamai chanjat : "Chez Felix". Es aquit que d'unu crompan lu sieus Pan Banhats, si mastegan una buòna pissaladièra, si fan calar una grata keka en anant au trampin ó alora en tornant de la grava.


Una vida de trampin doncas garçada a la rementa pèr una istòria de pítols. Si saupria se la comuna auguèsse un costat uman ! Se auguèsse la conoissença e lo gaube pèr acapir de cen que si debana en lu quartiers de la ciutat ! E vequí qu'es un luèc de sociabilitat que va chanjar de mans. Mai qu'un pilha-leva si tracta ben d'un ligam dau quartier. Mas d'aquò s'en batan la velhusa en pròpi. An bèu reüssit da amassar una tradicion familiala, doi generacions de travalh.


Mas uroament li gents dau quartier e d'en defuòra si son mobilisats totplen m'una peticion qu'a pròpi ben virat pi ! Lu mèdias locaus an jugat lo juèc finda e tot aquò a augut lo meriti de faire conoisser lo còup dau ciel que s'es avantat sus la familha de Joan-Carlo. La poblacion a pilhat en ment qu'èra bèu finit pèr lo pichin cabanon de Manhan, qu'èra la puada última e que li grata kekas son tralaissadi d'una marrida limonada.


Alora lo sabètz ben que siam en una temporada de votacion en aquesto moment. Una votacion legislativa pèr mandar lu deputats dau país si corcar davant la república francesa. La venguda e la firmada dau deputat en campanha de la promiera circonscripcion, Enric Ciotti, a augut au manco la tòca de faire sortir lu cacans de la maion comunala. E vequí que l'afaire deven político !


Coma de costuma m'aquela comuna son en la reacion e la comunicacion pèr sempre. Si son trovats sec davant la reacion populara e a ben caugut dire quaucaren. En pariera situacion lo cacan promier de la vila manda lo sieu caneton si pilhar la frandacion. D'un temps avia mes un bèu barabancho a la sieu plaça pèr dei carculs d'amolonament dei mandats, ancuèi n'es un que ven de Paris pèr chacharonar dau quartier Manhan ! Daida, si principia Carneval en pròpi ! Mas sobretot es aquit pèr fins de tartalhar una raça de respuòsta a la polèmica e, de fach, provar d'amurcir l'incendia.


En promiera rega Antòni Borré, cacan segond de la vila, replica ensin :

" Sabi cen qu'aquèu pilha-leva rapresenta dai Nissards. Siáu ren sospres de l'emocion instrumentalisada mas qu'esista."

En fach si tracta d'una convencion d'ocupacion dau domèni público e l'ajonch promier s'esconde darrier la lei :

" Non, lo cònsol a pas amassat "Da Felix". Despí lo 2010, siam oblijat de metre en concurréncia a la fin de la conchession. Siam plegats d'una procedura de seleccion preleminara e obligatòria, embé dei criteris".

Pura es ben lo cònsol qu'encastra lu criteris de seleccion e lu vequí :

- 70% de redevença. (aquèu que va prepauvar lo mai gròs afitament)

- 30% de qualitat sus lu produchs e desfolopament durable.


Mas l'adjonch confessa que lo critèri de la redevença es lo mai objectiu, lo mai dechisiu, lo mai major...

Aquò es una nòva dau buòn !

Es ben aquèu que paguerà lo mai...



Cadun la si farà au sieu sauçon coma de costuma mas coma son luènhs d'èstre dei dona-leva en aquesta comuna, an fach tres prepuòstas a Joan-Carlo :

- Una possibilitat de "rebombar" embé un negòci en la pesquiera Joan Medecin. Da saupre qu'es un negòci qu'a picat dau cuol.

- Una possibilitat d'aver un local carriera drecha au Babasoc. D'ivèrn m'avètz acapits m'avètz e la pràtiga es ren la parriera qu'a Manhan

- E pèr acabar la mai bèla ! Lo pompon, lu nhifs en la dauba, la cerièia sus lo pastisson de Savòia, lu asebics en la torta de blea :

La possibilitat de devenir ambassador au dedintre de la famoa maion de la coïna Nissarda. E aquò dau segur en vacacions...

Tantotun la chausida reven dau segur a Joan-Carlo e la sieu familha. Pèr autre la comuna non tornerà en darrier doncas es bèu cuech pèr lo pichin cabanon de Manhan.

Aquí e es pas grand cauva lo sabèm mas en lo Peolh Revengut siam darrier la familha Allais e vi convidam da anar firmar la peticion. Basta pèr lo símbolo, basta pèr faire mirar que lu Caga Bleas son aquit e n'an una estofia d'aquela comuna de malandrins.


Un còup de mai es un luèc popular que s'en va mas siguetz-toi ressegurats bravi gents de la Contea, d'aüra en avant podèm toi si manjar suedés en la plana de Var despí pauc.

Fortunats que siam...


 





59 vues0 commentaire

Posts récents

Voir tout